ოთხი ყველაზე აქტუალური თანამედროვე ინტერიერის დიზაინი
მას შემდეგ, რაც სახლის პროექტირებას დაასრულებთ და რემონტს შეუდგებით უკვე შეგიძლიათ დაიწყოთ იმაზე ფიქრი, თუ რა სტილში მოაწყობთ თქვენს საცხოვრებელ ადგილს. ინტერიერის დიზაინის შერჩევა პროფესიონალიზმს მოითხოვს და თქვენ აუცილებლად დაგჭირდებათ დიზაინერი, რომელიც თქვენს სურვილების და მოთხოვნილებების მაქსიმალურად გათვალისწინებით შექმნის მყუდრო და საინტერესო გარემოს. თუმცა არასდროსაა ურიგო მსგავს მნიშვნელოვან საკითხებში თავადაც ერკვეოდეთ, რადგან მაქსიმალურად მიიღოთ მონაწილეობა საკუთარი სახლის შექმნაში და საბოლოოდ, იყოთ კმაყოფილი იმ ადგილით, სადაც თავად იცხოვრებთ. სწორედ ამიტომ, გადავწყვიტეთ დეტალურად გაგაცნოთ ოთხი ყველაზე პოპულარული თანამედროვე ინტერიერის დიზაინი. ვინ იცის, იქნებ ამ სტატიის წაკითხვის შემდეგ ის სტილი აღმოაჩინოთ, რომელში ცხოვრებაც ძალიან დიდხანს მოგგვრით სიამოვნებას?!
სკანდინავიური სტილი
ეს სტილი ერთ-ერთი ყველაზე გამორჩეული და პოპულარულია თანამედროვე სამყაროში. მიუხედავად იმისა, რომ სკანდინავიური სტილი ევროპაში წარმოიშვა ის, მის გარეთაც საკმაოდ დიდი პოპულარობით სარგებლობს და ამის მიზეზი მისი ბუნებრიობა და პიროვნებაზე მორგებულობაა. მინიმალიზმი, უბრალოება და პრაქტიკულობა სკანდინავიური სტილის მთავარი მახასიათებელია. თუმცა ამ ყველაფერთან ერთად, ის ინარჩუნებს ელეგანტურობას და მიმზიდველობას. თუ თქვენ წესრიგის, სიმყუდროვის და ბუნებრიობის მოყვარული ბრძანდებით მაშინ, სკანდინავიური სტილის სახლში ცხოვრება აუცილებლად გესიამოვნებათ.
სკანდინავიურ ქვეყნებში ჩამოყალიბებული სტილი განპირობებულია მკაცრი კლიმატით, ცივი და ბნელი დღეებით, რამაც ბიძგი მისცა ხალხს სახლში შეექმნათ რაც შეიძლება ნათელი, მყუდრო და ბუნებასთან ახლოს მყოფი ინტერიერის სტილი. სწორედ ამიტომ, ამ სტილის მახასიათებელია ნაცრისფერი, თეთრი და მათთან ახლოს მდგომი ტონები, ხის და სხვა ბუნებრივი მასალების ავეჯი, რომელიც მცირე რაოდენობითაა წარმოდგენილი სახლში, რათა მაქსიმალურად მოხდეს ბუნებრივი სინათლის გაშლა ოთახებში.
თუ თქვენ ამ სტილში გადაწყვეტთ სახლის მოწყობას აუცილებლად უნდა გამოიყენოთ მეტალი და ყველა სახეობის ხე – დაწყებული პრიალა იატაკით დამთავრებული ხის მორებით. დიზაინერები ხშირად იყენებენ კუნძებს, ხის დიდ მორებს და ფესვებს მაგიდების, სკამების და სხვა ავეჯის გასაფორმებლად. ასევე, შეგიძლიათ მოდერნისტულ ავეჯს ვინტაჟური ნივთებიც შეუხამოთ, მთავარია ავეჯი იყოს მინიმალისტური, როგორც ფორმით, ისე ფერით და არა ზედმეტად პომპეზური.
მეტი სიმყუდროვისთვის გამოიყენეთ სხვადასხვა სახის ქსოვილები, ხალიჩები, ბალიშები, გადასაფარებლები, პლედები და სხვ. ასევე შეგიძლიათ კერამიკის დეკორი გამოიყენოთ. ოღონდ დაიმახსოვრეთ რომ ნებისმიერი დეკორატიული ნივთი უნდა იყოს ფუნქციურიც, რადგან ეს თვისება ერთ-ერთი მთავარი მახასიათებელია ამ სტილში.
მოდერდნი
თანამედროვე სტილი არ არის სტატიკური და მუდმივად ცვალებადია, თუმცა მასაც აქვს საბაზისო მახასიათებლები, რომელიც სიმარტივეში, კომფორტში და მინიმალიზმში გამოიხატება. ეს სტილი არ ეკუთვნის რომელიმე კულტურას და წარმოადგენს ინტერნაციონალურ დიზაინს, რომელიც თანამედროვეობამ წარმოშვა. მოდერნი იდეალურად ერგება, როგორც დიდ ისე, პატარა ფართის სახლებს.
თუ თქვენ ამ სტილს აირჩევთ გაითვალისწინეთ შემდეგი ფაქტორები: კარისა და ფანჯრის ჭრილები უნდა იყოს რკალისებრი ფორმის, რაც შეიძლება ფართო და მინიმალისტური დეკორატიული მახასიათებლებით. მოდერნს ასევე ახასიათებს არამკაცრი ხაზები, დახვეწილი ნეიტრალური ფერთა გამა. კედელი არ წარმოადგენს ერთ მთლიანობას. ის გაფორმებულია დაფარული კარადებით, ჩაშენებული თაროებით, ალუმინის სხვადასხვა პანელებით და სხვ. ჭერი დაყოფილია ასიმეტრიულ ფიგურებად, რომლისთვისაც დამახასიათებელია უხეში ხაზები. ასევე, განათებით და სარკეებით გაფორმება.
მინიმალიზმი
შეიძლება ითქვას, რომ ინტერიერში მინიმალიზმი ეს არის გამარტივებული თანამედროვე სტილი, ტიპური და მკაფიო გეომეტრიით. ბევრი ფიქრობს, რომ ეს სტილი არაპრაქტიკული, ძალიან მკაცრი და არაკომფორტულია. თუმცა ეს არ შეესაბამება სიმართლეს. მინიმალიზმი ნამდვილად არ არის ყველა ადამიანისთვის, რადგან ეს არის პირველ რიგში ცხოვრების სტილი და მისგან გამომდინარე წარმოქმნილი ინტერიერის დიზაინიც. მინიმალიზმში თქვენ ვერ შეხვდებით ზედმეტ ავეჯსა და ნივთს, თუმცა ის აუცილებლად მოიაზრებს ყველა იმ საჭირო ატრიბუტს, რომელიც გჭირდებათ ყოველდღიური, კომფორტული ცხოვრებისთვის.
ლაკონურია ყველაფერი ფერები, ავეჯი, დეკორი, ფორმები. აქ მნიშვნელოვანია პრაქტიკულობა, ფუნქციურობა და სისადავე. თუმცა ეს არ ნიშნავს, რომ ეს სტილი მოლოდ ძალიან მკაცრ ფერებს მოითხოვს (ნაცრისფერი, თეთრი, შავი). შესაძლებელია კრემისფერი, ღია ვარდისფერი და სხვა არა მკვეთრი ფერების გამოყენებაც, მთავარია სახლში ფიგურირებდეს 2-3 ტონალობა. მინიმალისტური სტილით იშვიათად აწყობენ საკუთარ სახლებს მთლიანად, რადგან ეს სტილი განსაკუთრებულად კომფორტულია პატარა ფართის ბინისა და საოფისე სივრცეებისთვის. თუმცა საკუთარ სახლში, მისი გამოყენება შეგიძლიათ ცალკეულ ოთახებში. რაც ნებისმიერ ოთახს შესძენს განსაკუთრებულად მშვიდ ხიბლს (მაგ: მინიმალისტური სამზარეულო არის ყველაზე პრაქტიკული რამ ინტერიერში).
ჯაპანდი
ჯაპანდის ტრენდი არის შედარებით ახალი ინტერიერის დიზაინში და ის წარმოადგენს სკანდინავიური და იაპონური სტილების ესთეტიკურ შერწყმას. ის გამოიყურება მინიმალისტურად, ფუნქციურად, თბილად, მშვიდად და კომფორტულად. სწორედ ესაა იმის მიზეზი, რომ ჯაპანდის სტილი სულ უფრო მეტი პოპულარობით სარგებლობს მსოფლიოში.
ეს არის ჰიბრიდული თანამედროვე ტრენდი დიზაინში, რომელიც აერთიანებს სკანდინავიური და იაპონური ინტერიერის დიზაინის ელემენტებს და ქმნის ელეგანტურ სტილს, რომელიც აღიარებული და მოწონებულია მსოფლიო მასშტაბით. არსებობს სამი კონკრეტული ასპექტი, რომელიც ამ სტილის მთავარი სპეციფიკური მახასიათებელია: ბუნებრივი ფერები, ავეჯის სტილი და აქსესუარები
იაპონური და სკანდინავიური სტილისთვის ბუნება არის გამაერთიანებელი ფაქტორი. ამიტომ, სახლში მაქსიმალურად შეიტანეთ ბუნებრივი მასალები ავეჯის სახით და მინიმუმადე დაიყვანეთ ზედაპირების მოპირკეთება. კედლებზე განლაგებული ხის პანელები და ოთახის მცენარეები სახლს იმ ხასიათს შესძენს, რომელიც სჭირდება. რაც შეეხება ფერებს აქ ჯაპანდის ბანაკი ორ ნაწილად იყოფა. ე.წ. Scandi – ის მოყვარულები ირჩევენ თეთრ ან ნეიტრალურ ფერთა პალიტრას მდიდარი აქცენტებით. ხოლო Japan-ის ბანაკი ირჩევს მდიდარ ფერს, კედლების დიდი ნაწილებისა და სხვა ელემენტების გასაფორმებლად. ორივე შემთხვევაში მნიშვნელოვანია იმუშაოთ ბუნებრივ ტონებზე, როგორიცაა ლურჯი, მწვანე, ქლიავისფერი და ყავისფერი. ჯაპანდის სტილში ასევე ფავორიტია შავი ფერი.
უნდა გახსოვდეთ, რომ ორივე ქვეყნის დიზაინი ყურადღებას უთმობს აქსესუარებს, რომლებიც უპირატესობას ანიჭებენ ფუნქციურობას, დეკორაციასთან შედარებით. გააწყვეთ სახლი მოჭიქული კერამიკული ჭურჭლით, ვაზებით და წიგნებით. და ბოლოს, შეუთავსეთ სკანდინავიურ შინაურ კომფორტს იაპონური არასრულყოფილება – კონტრასტული ბალიშებისა და გადასაფარებლების საშუალებით.
